مشيت انا و زوجتي و بنتي الي عمرها 8 سنوات نهار الاحد باش نمارسوا حقنا ونأديو واجبنا الانتخابي.

سليمة بنتي كانت مهتمة برشا بالعملية الانتخابية وكانت تتمنى تحط صبعها في الحبار الأزرق كي الكبار. قالتلها امها اصبر شويا وانا متأكدة الي كي يصير عمرك 18 سنة ماك باش تعدي حتى انتخابات من غير ما تنتخب وانا نغزرلها فخور بيها و شاعر بمسؤولية كل أب : شنية لبلاد الي باش نخليها لبنتي ؟

الحقيقة نتائج الانتخابات هذي ما كانت فيها حتى مفاجأة. من خلال الدراسات الي قمنا بيها في منظمة Tunivisions كان واضح الي نسبة العزوف باش تكون كبيرة وكان واضح الي الشباب مستقيل تماما من الشأن العام وخاصة السياسي
واحنا مدينين في ذلك لأداء السياسين الي يشغلو في الساحة الآن والإعلام أيضا الي مهمش دورو في بناء الحضارة تحت عنوان نسب المشاهدة.

الدرس لول وفا يا سادة نتعداو للدرس الثاني : كيفاش نرجعو تونس لشبابها وكيفاش نرجعو الشباب لبلادو؟ كيفاش نخلقو تنظيمات جديدة تلم وما تفرقش تبني وما تهدش؟
كيفاش نقنعو 67 % من الناخبين الي ما صوتوش ليوم انو من غير صوتهم حد ما يسمعهم و شي ما يتبدل ؟ كيفاش نفهمو السياسيين انو من غير نظرة شاملة بعيد عالانانية وطموح كبير لتغيير عميق لبلاد ماشية للهاوية.

للحديث بقية

ربي يحفظكم وربي يحفظ تونس

Load More Related Articles

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *

Check Also

نزار الشعري يواكب إنطلاق نشاط Club Tunivisions ISET Com